നിലവിലുള്ള അറിവു വെച്ചു അല്ലാഹുവിനെ ആരാധിച്ചാല് പോരേ, അത് കൊണ്ട് അള്ളാഹു ത്രിപ്തനാകില്ലേ എന്നെല്ലാം ചോദിച്ചു എന്റെ ഒരു സുഹൃത്ത്.
ഇസ്ലാമില് ഓരോരുത്തനും അവനവനു ഉള്ള അറിവു വെച്ചു അല്ലാഹുവിനു ഇബാദത് ചെയ്യല് നിര്ബന്ധമാണ്. എന്നാല്, അത് കൊണ്ട് മാത്രം മതിയാവുന്നില്ല.
ഖുദ്സിയ്യായ ഒരു ഹദീസില് അള്ളാഹു പറയുന്നു; "ഞാന് മറഞ്ഞ ഒരു നിധിയായിരുന്നു. അപ്പോള് ഞാന് അറിയപ്പെടാന് ആഗ്രഹിച്ചു. അതിനാല് ഞാന് പടപ്പുകളെ പടച്ചു." മനുഷ്യ സൃഷ്ടിയുടെ തന്നെ ലക്ഷ്യമായി ഈ ഹദീസില് വിശദീകരിക്കുന്നത് അല്ലാഹുവിനെ അറിയുക എന്നതിനെയാണ്. അതിനാല്, ഉള്ള അറിവുകളില് ഒതുങ്ങി നിന്ന്, അല്ലാഹുവിനെ കൂടുതല് അറിയാന് ശ്രമിക്കാതിരിക്കുന്നതിനെ നമുക്കെങ്ങനെ അംഗീകരിക്കാനാവും?
പ്രവാചകനായി നിയമിക്കപ്പെട്ട ലോകാനുഗ്രഹി മുഹമ്മദ് മുസ്ഥഫ (സ) യോട് പോലും അള്ളാഹു കല്പിച്ചതു; അറിവു വര്ധിപ്പിച്ചു കിട്ടാന് വേണ്ടി ദുആ ചെയ്യാനായിരുന്നു (ത്വാഹ - ൧൧൪). ഒരു മനുഷ്യന് എത്ര തന്നെ അറിഞ്ഞാലും ആ അറിവുകളില് ഒതുങ്ങി നില്ക്കാന് ഇസ്ലാം അനുവദിക്കുന്നില്ലെന്ന് മനസ്സിലാക്കാന് ഇതില് പരം തെളിവു വേണ്ടല്ലോ?
